МУҮХ, “СУТАЙН БОР” клубын тамирчин ОУХМ Н.Хэрлэн АНУ-д зохиогдох Дэлхийн цомын тэмцээнд оролцохоор эх орноосоо мордлоо.

МУҮХ-ноос АНУ-д зохиогддог дэлхийн цомын аварга шалгаруулах тэмцээнд анх удаа өөрийн тамирчнаа ийнхүү сойж байна.

Энэ удаагийн тэмцээнд нийт 16 орны 68 тамирчин оролцох юм.

АНУ-ын Денвер хот өөрийн Цэцэрлэгт хүрээлэн/Civic Center Park/-д анх удаа энэхүү нэр хүндтэй тэмцээнийг хүлээн авч байгаа ажээ. ОУУХ/UIAA/-той American Alpine Club хамтран ажиллана. АНУ-ын Колорадо муж бол мөнх цаст уултай нутаг юм.

II.Өгье гэвэл ганцаасаа

Засгийн газрын хэрэгжүүлэгч агентлаг Биеийн тамир,спортын газар/БТСГ/-ын дарга МУГТ,Ц.Шаравжамц тэргүүтэй тус хамт олонд МУҮХ, “СУТАЙН БОР” клубын хамт олноос онцгойлон талархал илэрхийлж байна. Учир юун хэмээвээс ОУХМ Н.Хэрлэнгийн АНУ-ыг зорих тэмцээн/унаа, байр, хоол/-ий зардалыг БТСГ-аас санхүүжүүлсэнийг дуулгахад нэн таатай байна.Урам зориг хайрлав бидэнд.Манай ард түмэн “Агтны хариу жилдээ” гэдэг. Алсын замд агт мориор тусалсан Та бүхэнд баярлалаа. Бид хичээнэ ээ!.

III.АНУ-аас ОХУ-ыг зорино

ОУХМ Н.Хэрлэн АНУ-ын цувралын дараа ОХУ-ын Москва хотод 2019 оны 2 дугаар сарын 26-нд хүрэлцэн ирэх бөгөөд улмаар Киров хотыг зорино. Энд дэлхийн аварга шалгаруулах тэмцээний бэлтгэл хийнэ. Мөсөнд авиралтын 2019 оны дэлхийн аварга шалгаруулах тэмцээн ОХУ-ын Киров хотноо 2019 оны 3 дугаар сарын 8-наас 10-ны өдрүүдэд зохиогдох бөгөөд ОУХМ Н.Хэрлэн МУҮХ-ны баг хамт олонтой нэгдэн дэлхийн шилдэгүүдтэй нутгийнх нь дэвжээн дээр өрсөлдөх юм.

Аян замдаа сайн яваарай. Амжилт хүсье.